როგორ შევაჩვიოთ ბავშვები პირის ღრუს ჰიგიენას?

07 ივლისი 2022

ბავშვთა პირის ღრუ და მისი სპეციფიკა

რუტინული ჩვევები ჩვენი ხასიათის ნაწილია, როცა საქმე ჯანმრთელ პირის ღრუს ეხება. ლამაზი, ჯანმრთელი კბილები და ღრძილები სწორი ჰიგიენური ჩვევების შედეგია, რომელიც ადრეული ბავშვობიდან ყალიბდება. მანამ სანამ, ვისაუბრებთ იმაზე თუ როგორ უნდა ჩამოვუყალიბოთ პატარებს პირის ღრუს წმენდის სწორი რუტინული ჩვევები, მნიშვნელოვანია, ვიცოდეთ ბავშვის პირის ღრუს განვითარების მახასიათებლების შესახებ.

არსებობს ერთგვარი შკალა, რომლის მიხედვითაც ხელმძღვანელობენ როგორც ბავშვთა სტომატოლოგები, ასევე პედიატრები. ამ შკალის მიხედვით პირველი კბილის ამოჭრა  ქვედა ყბაზე 6-8 თვის ასაკში ხდება. მნიშვნელოვანია, ვიცოდეთ, რომ მიუხედავად სტანდარტული შკალის არსებობისა ყველა ადამიანის ორგანიზმი ინდივიდუალურია და იგი არ მისდევს რაიმე კონკრეტულ გრაფიკს. თუ ბავშვს პირველი კბილი 4 თვის ასაკში ამოუვიდა ეს იმას ნიშნავს, რომ იგი სხვებთან შედარებით, კბილებსაც უფრო ადრე მოიცვლის და მუდმივი კბილებიც უფრო მალე ამოუვა. ანალოგიურად, თუ პირველი კბილი ერთი წლის ასაკში ამოვა შესაძლოა კბილების მოცვლის პროცესიც დაყოვნდეს და ბავშვმა კბილები 6 წლის ასაკში მოიცვალოს, ხოლო  თუ ბავშვს პირველი კბილი 1 წელზე უფრო  გვიან ასაკში ამოუვიდა, შესაძლოა მან კბილების მოცვლა 7-8 წლის ასაკშიც კი დაასრულოს.

როდის უნდა დავიწყოთ პირის ღრუს ჰიგიენაზე ზრუნვა?

პირის ღრუს ჰიგიენაზე ზრუნვა უნდა დავიწყოთ ბავშვის განვითარების საწყის ეტაპზევე. ამ დროს პირის ღრუში უკვე არის მაგარი ქსოვილი, რომელიც ბავშვს მინიმუმ 6 წელი უნდა ემსახუროს. სწორედ ამიტომ არსებობს სპეციალური პირის ღრუს საწმენდი სილიკონები, ასაკობრივი ჯაგრისები, რომელთა გამოყენებაც რეკომედებულია ექვსი თვიდან 3 წლამდე.  0-3 წლამდე ასაკისათვის განკუთვნილი ჯაგრისები არის ძალიან ნაზი და ბავშვებისათვის საკმაოდ ადვილია მათი გამოყენება. ის არ აზიანებს ღრძილებს, რაც განსაკუთრებით მნიშვნელოვანია, მაშინ როცა პატარა ჯერ კიდევ ეჩვევა კბილების გახეხვის ყოველდღიურ პროცესს.

ძალიან ხშირად მშობლებს ჰგონიათ, რომ ბავშვმა კბილები დამოუკიდებლად უნდა გამოიხეხოს, რასაც ისინი 7 წლამდე ვერ ახერხებენ. სწორედ  შვიდი წლის ასაკში უვითარდებათ ბავშვებს მანუალური ჩვევები.

ყველაზე მარტივი მანუალური ჩვევა არის თასმის შეკვრა. სანამ ბავშვი დამოუკიდებლად თასმის შეკვრას, წერას და ხატვას არ შეძლებს, ის არ არის მზად იმისთვის, რომ საკუთარი პირის ღრუს ჰიგიენაზე დამოუკიდებლად იზრუნოს. რასაკვირველია, ეს იმას არ ნიშნავს, რომ ბავშვს მოტივაცია არ მივცეთ. ცხადია, ბავშვმა თვითონ უნდა გამოიხეხოს კბილები, მაგრამ ჩვენ თვალყური უნდა ვადევნოთ ამ პროცესს და მონაწილეობა მივიღოთ მასში.

როგორ შევაჩვიოთ ბავშვები პირის ღრუს ჰიგიენას?

ბავშვის პირის ღრუს ჯანმრთელობის შენარჩუნებისათვის ძალიან მნიშვნელოვანია, მშობლებმა სათანადო ყურადღება მიაქციონ კბილების წმენდის პროცესს და ჩამოუყალიბონ ბავშვებს სწორი ჩვევები. იმისთვის, რომ თქვენმა შვილებმა შეიყვარონ კბილების წმენდის რუტინა და შეინარჩუნონ ჯანმრთელი კბილები, „ბლიც დენტალ - კახაბერ ხარებავას კლინიკა“ გირჩევთ:

• მიაჩვიეთ თქვენი შვილი ყოველდღიურ პირის ღრუს ჰიგიენას, ჯერ კიდევ იმ ასაკიდან, სანამ კბილები ამოეჭრება. ეს მათ  თავიდან ააცილებს მომავალში კარიესის განვითარების საფრთხეს.
  პირის ღრუს გასუფთავება ყოველი კვების შემდეგ სპეციალური, ახალშობილთათვის განკუთვნილი სავლებით ან უბრალოდ წყლით ხელს შეუშლის არასასურველი ბაქტერიების გამრავლებას.
• კბილების ამოჭრის შემდეგ გამოიყენეთ თქვენი შვილის ასაკისათვის შესაფერისი კბილის ჯაგრისი. შესაძლებელია როგორც სილიკონის, ასევე ნაზი ჯაგრისის შერჩევა.
• გახადეთ კბილების გაწმენდის რუტინა მხიარული, მიეცით ამ ყველაფერს თამაშის ფორმა და არ დაგავიწყდეთ თქვენი შვილის დაჯილდოება კარგად შესრულებული „დავალების“ შემდეგ.
• ხშირად, ბავშვისათვის თავის მოვლის მარტივი წესების სწავლებაში, მშობლებს ეხმარება „თანამონაწილეობის პრინციპი“. გაიხეხეთ კბილები ერთად, ასე თქვენი შვილი აიღებს მაგალითს თქვენგან და უკეთ გაიაზრებს პირის ღრუს წმენდის აუცილებლობას.

„ბლიც დენტალ - კახბერ ხარებავას კლინიკა“ ასევე გირჩევთ, ადრეული ასაკიდანვე მიაჩვიოთ თქვენი შვილი სტომატოლოგთან რეგულარულ ვიზიტს. ამ გზით პირის ღრუს მოვლა ბუნებრივ და აუცილებელ ჩვევად გადაიქცევა, რაც შემდგომში მომხიბვლელი და ჯანსაღი ღიმილის გარანტიაა.