როგორ დავძლიოთ დენტოფობია?

15 აგვისტო 2024

როგორ მოქმედებს შფოთვა ჩვენს ჯანმრთელობაზე?

მანამ, სანამ ყურადღებას გავამახვილებთ იმ ხერხებზე, თუ როგორ დავძლიოთ სტომატოლოგთან ვიზიტის შიში, მნიშვნელოვანია, გავიაზროთ თუ რა გავლენას ახდენს შფოთვა ჩვენს ორგანიზმზე. სტომატოლოგთან პროფილაქტიკური თუ სამკურნალო ვიზიტები და პირის ღრუს პრობლემების დროული მოგვარება გადამწყვეტ როლს თამაშობს როგორც თქვენი კბილებისა და ღრძილების, ასევე ორგანიზმის საერთო ჯანმრთელობის შენარჩუნებაში. სტომატოლოგთან ვიზიტის შიშის გამო დაგვიანებულმა და გადადებულმა მკურნალობამ  შეიძლება გამოიწვიოს ისეთი უარყოფითი შედეგები, როგორებიცაა:

• ლაქებიანი და გამუქებული კბილის ზედაპირი;
• ჩამოტეხილი და/ან გაბზარული კბილები;
• ღრძილების დაავადება (პაროდონტიტი);
• ღრძილების რეცესია (ღრძილის ქსოვილების განლევა);
• კარიესი და კბილის ღრუები;
• კბილის დაკარგვა.

შიშის მიზეზების გაანალიზება და მისი მართვა

თქვენი შიშის აღიარება, შფოთვის დამარცხებისაკენ გადადგმული  პირველი ნაბიჯია. მნიშვნელოვანია ჩაუღრმავდეთ საკუთარ აზრებს და ზუსტად განსაზღვროთ, სტომატოლოგთან ვიზიტის რომელი დეტალი იწვევს თქვენში ყველაზე მეტად შფოთვის განცდას. პაციენტების უმეტესობა აღნიშნავს, რომ მათი შიშის მთავარი მიზეზი არის ტკივილი. საბედნიეროდ, უახლოეს წარსულთან შედარებით, თანამედროვე სტომატოლოგიური აპარატურა და მკურნალობა გაცილებით ნაკლებად ინვაზიური და ბევრად უფრო ნაზი და კომფორტულია. მაღალი ხარისხის აპარატურასა და სტომატოლოგების პროფესიონალიზმთან ერთად, მნიშვნელოვანია სტომატოლოგის დამოკიდებულება პაციენტისადმი, რომ მკურნალობის პროცესი იყოს რაც შეიძლება კომფორტული და უმტკივნეულო.

ზოგიერთი ადამიანისთვის, სტომატოლოგიურ სავარძელზე მოთავსება უკვე საკმარისია იმისთვის, რომ გაუმძაფრდეს შფოთვის განცდა. ამას ხშირ შემთხვევაში თან ერთვის შიში თავად პროცესისადმი. ძირითადად, პაციენტებმა არ იციან დეტალები, სამკურნალო პროცედურის შესახებ, ამიტომაც აქვთ შეგრძნება, თითქოს კარგავენ კონტროლს მიმდინარე მოვლენებზე. საბედნიეროდ, თანამედროვე ეპოქაში როგორც სტომატოლოგიური ტექნიკა, ასევე სტომატოლოგიური სავარძლები და ზოგადად, მთლიანი კაბინეტი, მაქსიმალურად მორგებულია პაციენტის საჭიროებებზე. ჩვენი კლინიკის პროფესიონალები კი დეტალურად აგიხსნიან მკურნალობის მიმდინარე პროცესებს და მოგაწვდიან სრულ ინფორმაციას.

„ბლიც დენტალი - კახაბერ ხარებავას სტომატოლოგიური კლინიკა“ გთავაზობთ რჩევებს, რომელიც დაგეხმარებათ დაძლიოთ სტომატოლოგთან ვიზიტის შიში.

• იპოვეთ თქვენთვის შესაფერისი ექიმი. სწორად შერჩეული სტომატოლოგი შეგიქმნით კომფორტულ გარემოს;
•  სტომატოლოგთან ვიზიტის წინ სცადეთ დამშვიდება, წინასწარ გაისეირნეთ ფეხით, მოუსმინეთ მუსიკას ან მედიტირდით;
•  თან წაიყვანეთ მეგობარი, ასე თავს მარტოდ აღარ იგრძნობთ;
• მიდით კლინიკაში დანიშნულ დროზე უფრო ადრე, ასე მეტი დრო გექნებათ შეეჩვიოთ და გაიცნოთ გარემო;
•  აუცილებლად უთხარით თქვენს ექიმს თქვენი ფობიის შესახებ, რათა იგი იყოს მზად შესაძლო გართულებებისათვის;
• დასვით ნებისმიერი კითხვა, რომელიც გაგიჩნდებათ და დაელოდეთ პასუხს - რაც უფრო მეტი ინფორმაცია გექნებათ პროცედურასთან დაკავშირებით, მით უფრო მშვიდად იგრძნობთ თავს.